ಗಾಂಧಿ ಹತ್ಯೆಯ ಅಂತಿಮ ಚಾರ್ಜ್‌ಶೀಟ್ ಪ್ರತಿ ನಾಪತ್ತೆ?

ನವದೆಹಲಿ: ಮಹಾತ್ಮಗಾಂಧಿ ಅವರ ಹತ್ಯೆಗೆ ಸಂಬಂಧಿಸಿದ ಅಂತಿಮ ಆರೋಪ ಪಟ್ಟಿಯ ಪ್ರತಿ ನಾಪತ್ತೆಯಾಗಿದೆ. ಆರ್‌ಟಿಐ ಕಾರ್ಯಕರ್ತರೊಬ್ಬರು ಸಲ್ಲಿಸಿದ ಅರ್ಜಿಯಲ್ಲಿ ಈ ಅಂಶ ಬಹಿರಂಗಗೊಂಡಿದೆ.

ಅಲ್ಲದೇ ಗಾಂಧಿ ಕುಟುಂಬದ ಮನವಿಯ ಮೇರೆಗೆ ಅವರ ಮೃತದೇಹದ ಮರಣೋತ್ತರ ಪರೀಕ್ಷೆಯನ್ನೂ ನಡೆಸಲಾಗಿಲ್ಲ ಎಂದು ತಿಳಿದು ಬಂದಿದೆ.

ಹರಿಯಾಣದ ಹೇಮಂತ್ ಪಾಂಡ ಎಂಬುವವರು ಗಾಂಧಿ ಹತ್ಯೆಯ ಚಾರ್ಜ್‌ಶೀಟ್‌ನ ನಕಲು ಪ್ರತಿ ಮತ್ತು ಮರಣೋತ್ತರ ಪರೀಕ್ಷೆಯ ಮಾಹಿತಿ ಕೋರಿ 7 ಅಂಶಗಳ ಆರ್‌ಟಿಐ ಅರ್ಜಿಯನ್ನು ಸಲ್ಲಿಸಿದ್ದರು.

ಕೇಂದ್ರ ಮಾಹಿತಿ ಆಯೋಗ ಕೂಡ ಜ 30, 1948ರಲ್ಲಿ ನಡೆದ ಗಾಂಧಿ ಹತ್ಯೆಗೆ ಸಂಬಂಧಿಸಿದಂತೆ ದೆಹಲಿ ಪೊಲೀಸರು ಹಾಕಿರುವ ಅಂತಿಮ ಆರೋಪ ಪಟ್ಟಿಯ ಪ್ರತಿಯನ್ನು ಬಹಿರಂಗಪಡಿಸುವಂತೆ ಗೃಹಸಚಿವಾಲಯಕ್ಕೆ ಸೂಚಿಸಿತ್ತು.

ಗೃಹ ಸಚಿವಾಲಯ ಈ ಅರ್ಜಿಯನ್ನು ರಾಷ್ಟ್ರೀಯ ಪತ್ರಾಗಾರಕ್ಕೆ ಕಳುಹಿಸಿತ್ತು. ಗಾಂಧಿ ಸ್ಮೃತಿ ಹಾಗೂ ದರ್ಶನ ಸಮಿತಿಗೂ ಪಾಂಡಾ ಅವರ ಅರ್ಜಿ ಕಳುಹಿಸಲಾಗಿತ್ತು. ಎಫ್‌ಐಆರ್ ಹಾಗೂ ಆರೋಪಪಟ್ಟಿ ತುಘಲಕ್ ರಸ್ತೆಯ ಪೊಲೀಸ್ ಠಾಣೆಯಲ್ಲಿ ಇರುವ ಸಾಧ್ಯತೆಯಿದೆ ಇದು ತಿಳಿಸಿದೆ ಎನ್ನಲಾಗಿದೆ.

ಇದೀಗ ಗಾಂಧಿ ಹತ್ಯೆಯ ಎಫ್‌ಐಆರ್ ಪ್ರತಿ ನಾಪತ್ತೆಯಾಗಿದೆ ಮತ್ತು ರಾಷ್ಟ್ರಪಿತನ ಮರಣೋತ್ತರ ಪರೀಕ್ಷೆಯನ್ನು ನಡೆಸಲಾಗಿಲ್ಲ ಎಂಬ ಮಾಹಿತಿ ಹೊರ ಬಿದ್ದಿದೆ.