ಭೋಪಾಲ್: ನಮಗೆ ಉತ್ತಮ ದರ ಸಿಗದಿದ್ದರೂ ಪರವಾಗಿಲ್ಲ ಇನ್ನು ಮುಂದೆ ಪಾಕಿಸ್ಥಾನಕ್ಕೆ ಟೊಮ್ಯಾಟೋವನ್ನು ರಫ್ತು ಮಾಡುವುದಿಲ್ಲ ಎಂದು ಮಧ್ಯಪ್ರದೇಶದ ಜಬುವಾದ ರೈತರು ದೃಢ ನಿರ್ಧಾರ ತೆಗೆದುಕೊಂಡಿದ್ದಾರೆ. ಪುಲ್ವಾಮ ದಾಳಿಯ ಹಿನ್ನಲೆಯಲ್ಲಿ ಅವರು ಈ ನಿರ್ಧಾರಕ್ಕೆ ಬಂದಿದ್ದಾರೆ.
ನಾವು ಬೆಳಸಿದ ಆಹಾರವನ್ನು ತಿಂದು ಅವರು ನಮ್ಮ ಯೋಧರನ್ನೇ ಕೊಲ್ಲುತ್ತಿದ್ದಾರೆ. ರಫ್ತಿನಿಂದ ಸಿಗುವ ಹೆಚ್ಚುವರಿ ಆದಾಯದ ಆಸೆ ನಮಗಿಲ್ಲ. ಯೋಧರೇ ಇಲ್ಲದಿದ್ದರೆ ನಮಗೆ ಬದುಕಲು ಸಾಧ್ಯವೇ? ಎಂಬುದಾಗಿ ಇಲ್ಲಿನ ರೈತರು ಹೇಳಿದ್ದಾರೆ.
‘ನಾವು ರೈತರು, ಟೊಮ್ಯಾಟೋವನ್ನು ಬೆಳೆಸುತ್ತೇವೆ. ಈ ಟೊಮ್ಯಾಟೋಗಳನ್ನು ಪಾಕಿಸ್ಥಾನಕ್ಕೂ ಕಳುಹಿಸುತ್ತೇವೆ. ಆದರೆ ಅವರು ನಮ್ಮ ಆಹಾರ ತಿಂದು ನಮ್ಮ ಯೋಧರನ್ನೇ ಕೊಲ್ಲುತ್ತಿದ್ದಾರೆ. ನಾವು ಪಾಕಿಸ್ಥಾನ ಧ್ವಂಸವಾಗುವುದನ್ನು ಬಯಸುತ್ತೇವೆ. ಯಾವ ದೇಶವೂ ಅವರಿಗೆ ಟೊಮ್ಯಾಟೋ ಪೂರೈಸದಂತೆ ಮಾಡಬೇಕಿದೆ’ ಎಂದು ರೈತ ರವೀಂದ್ರ ಪಟಿಡಾರ್ ಎಂಬುವವರು ಹೇಳಿದ್ದಾರೆ.
‘ಪಾಕಿಸ್ಥಾನಕ್ಕೆ ಮಾಡುವ ರಫ್ತಿನಿಂದ ಬರುವ ಹಣದ ಬಗ್ಗೆ ನಮಗೆ ಚಿಂತೆಯಿಲ್ಲ, ನಮ್ಮ ಸೈನಿಕರು ಸತ್ತರೆ ನಮ್ಮನ್ನು ರಕ್ಷಣೆ ಮಾಡುವವರು ಯಾರು? ರಫ್ತಿನಿಂದ ಬರುವ ಹೆಚ್ಚುವರಿ ಹಣ ವ್ಯರ್ಥವಾಗುತ್ತದೆ’ ಎಂದು ಮತ್ತೊಬ್ಬ ದೊಡ್ಡ ಟೊಮ್ಯಾಟೋ ಬೆಳೆಗಾರ ಬಸಂತಿ ಲಾಲ್ ಪಟೇದಾರ್ ಹೇಳಿದ್ದಾರೆ.
ಈ ಭಾಗದಲ್ಲಿ ಸುಮಾರು 500 ರೈತರು ಟೊಮ್ಯಾಟೋ ಬೆಳೆದಿದ್ದಾರೆ. ಇಲ್ಲಿಂದ ಅಪಾರ ಪ್ರಮಾಣದ ಟೊಮ್ಯಾಟೋಗಳು ಪಾಕಿಸ್ಥಾನಕ್ಕೆ ರವಾನೆಯಾಗುತ್ತದೆ. ಆದರೆ ಈಗ ಪುಲ್ವಾಮ ದಾಳಿಯ ಬಗ್ಗೆ ಆಕ್ರೋಶಿತರಾಗಿರುವ ರೈತರು ಆ ದೇಶ ಟೊಮ್ಯಾಟೋ ರಫ್ತು ಮಾಡದಿರುವ ಬಗ್ಗೆ ದೃಢ ನಿರ್ಧಾರ ತೆಗೆದುಕೊಂಡಿದ್ದಾರೆ.
Admin
ಸಮಾಜದ ಉತ್ತಮ ಸುದ್ದಿಗಳನ್ನು ನಾವು ನಿಮ್ಮ ಮುಂದಿಡುವ ಪ್ರಯತ್ನವನ್ನು ಮಾಡುತ್ತಿದ್ದೇವೆ. ಪ್ರೋತ್ಸಾಹಿಸಿ, ಸ್ವೀಕರಿಸಿ. ನೀವು ಸ್ವೀಕರಿಸಿದಾಗ ನಾವು ಬೆಳೆಯಬಹುದು. ಒಳ್ಳೆಯ ಸುದ್ದಿಗಳಿಗೆ ಸಮಾಜ ತೆರೆದುಕೊಂಡಿದೆ ತಲುಪಿಸುವವರು ನಾವಾಗಬಾರದೇಕೆ?
