ದೆಹಲಿ ಚುನಾವಣೆಗೂ ಬಿಜೆಪಿ ಪರ ಯೋಗಿ ಪ್ರಚಾರ

ನವದೆಹಲಿ: ಉತ್ತರಪ್ರದೇಶ ವಿಧಾನಸಭಾ ಚುನಾವಣೆಯಲ್ಲಿ ಬಿಜೆಪಿಯ ಭಾರೀ ಗೆಲುವಿನ ನಂತರ ಯೋಗಿ ಆದಿತ್ಯನಾಥ್ ಯುಪಿ ಮುಖ್ಯಮಂತ್ರಿ ಅಲ್ಲದೇ ಬಿಜೆಪಿ ಪಕ್ಷದ ಓರ್ವ ಸ್ಟಾರ್ ಪ್ರಚಾರಕ ಕೂಡ ಆಗಿದ್ದಾರೆ. ಯೋಗಿ ಆದಿತ್ಯನಾಥ್ ಅವರು ಮುಂಬರುವ ಗುಜರಾತ್ ವಿಧಾಸಭಾ ಚುನಾವಣೆಯ ಸ್ಟಾರ್ ಪ್ರಚಾರಕ ಎಂದು ಈಗಾಗಲೇ ಹೇಳಲಾಗುತ್ತಿದ್ದು, ಇದೀಗ ದೆಹಲಿ ಪುರಸಭಾ ಚುನಾವಣೆಗೆ ಬಿಜೆಪಿ ಪರ ಪ್ರಚಾರ ನಡೆಸಲಿದ್ದಾರೆ ಎಂಬ ಬಗ್ಗೆ ಮೂಲಗಳು ತಿಳಿಸಿವೆ.

ಯುಪಿ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಅಲ್ಲದೇ ಇತರ 8 ಮಂದಿ ಸದಸ್ಯರು ಬಿಜೆಪಿ ಪರ ಪ್ರಚಾರ ನಡೆಸಲಿದ್ದು, ಈ ಪ್ರಚಾರ ತಂಡದಲ್ಲಿ 4 ರಾಜ್ಯಗಳ ಮುಖ್ಯಂತ್ರಿಗಳು ಮತ್ತು 14 ಕೇಂದ್ರ ಸಚಿವರು ಇರಲಿದ್ದಾರೆ. ಪ್ರಚಾರ ತಂಡದ ಪ್ರಮುಖ ತಂಡದಲ್ಲಿ ಕೇಂದ್ರ ಸಚಿವರಾದ ನಿಮರ್ಮಲಾ ಸೀತಾರಾಮನ್, ವಿಜಯ್ ಗೋಯಲ್, ಜಿತೇಂದ್ರ ಸಿಂಗ್ ಹಾಗೂ ಸಂಜಯ್ ಬಾಲ್ಯಾನ್ ಇರಲಿದ್ದಾರೆ ಎಂದು ಮೂಲಗಳು ತಿಳಿಸಿವೆ.

ಉತ್ತರ, ದಕ್ಷಿಣ ಮತ್ತು  ಪೂರ್ವ ದೆಹಲಿಯ ಪುರಸಭಾ ಚುನಾವಣೆಯ 272 ಸ್ಥಾನಗಳಿಗೆ ಹೊಸ ಮುಖಗಳನ್ನು ಕಣಕ್ಕೆ ಇಳಿಸಲು ಬಿಜೆಪಿ ನಿರ್ಧರಿಸಿದೆ. ಪುರಸಭಾ ಶಾಸಕರು ಅಥವಾ ಅವರ ಕುಟುಬಸ್ಥರನ್ನು ಕಣಕ್ಕೆ ಇಳಿಸದಿರಲು ಪಕ್ಷ ನಿರ್ಧರಿಸಿದೆ.

ದೆಹಲಿ ಪುರಸಭಾ ಚುನಾವಣೆಗಳಲ್ಲಿ ವರ್ಷಗಳಿಂದ ಪ್ರಾಬಲ್ಯ ಪಡೆದಿರುವ ಬಿಜೆಪಿ, ಈ ಬಾರಿಯೂ ತನ್ನ ಪ್ರಾಬಲ್ಯ ತೋರಿಸಲು ಮುಂದಾಗಿದೆ, ಪಂಜಾಬ್ ಮತ್ತು ಗೋವಾ ವಿಧಾನಸಭಾ ಚುನಾವಣೆಗಳಲ್ಲಿ ಕಳಪೆ ನಿರ್ವಹಣೆ ತೋರಿದ ಬಳಿಕ ಅರವಿಂದ್ ಕೇಜ್ರಿವಾಲ್ರ ಆಮ್ ಆದ್ಮಿ ಪಕ್ಷ ದೆಹಲಿ ಚುನಾವಣೆಯಲ್ಲಿ ಬಿಜೆಪಿಗೆ ಸವಾಲೊಡ್ಡಿದೆ.

ಬಿಜೆಪಿ ರಾಷ್ಟ್ರಾಧ್ಯಕ್ಷ ಅಮಿತ್ ಶಾ ಅವರು ಕೇಂದ್ರ ಸಚಿವರು, ಸಂಸತ್ ಸದಸ್ಯರು ಹಾಗೂ ದೆಹಲಿಯ ಬಿಜೆಪಿ ನಾಯಕರೊಂದಿಗೆ ಚುನಾವಣಾ ಕಾರ್ಯತಂತ್ರದ ಬಗ್ಗೆ ಎರಡು ಪ್ರತ್ಯೇಕ ಸಭೆ ನಡೆಸಿ ಚರ್ಚಿಸಿದ್ದಾರೆ ಎಂದು ಮೂಲಗಳು ತಿಳಿಸಿವೆ.