ನಗದು ರಹಿತ ವೇತನ ಪಾವತಿ ಕಡ್ಡಾಯಗೊಳಿಸಿ ಸಂಪುಟ ಸುಗ್ರೀವಾಜ್ಞೆ

ನವದೆಹಲಿ: ಡಿಜಿಟಲ್ ವ್ಯವಹಾರಕ್ಕೆ ಉತ್ತೇಜನೆ ನೀಡಲು ಮುಂದಾಗಿರುವ ಕೇಂದ್ರ ಸರ್ಕಾರ, ಕೈಗಾರಿಕಾ ಸಂಸ್ಥೆಗಳು, ಉದ್ಯಮಿಗಳು ಚೆಕ್ ಅಥವಾ ಇಲೆಟ್ರಾನಿಕ್ ವಿಧಾನವನ್ನು ಬಳಸಿ ನಗದು ರಹಿತ ವೇತನ ಪಾವತಿ ಮಾಡಲು ವೇತನ ಪಾವತಿ ಕಾಯಿದೆ ತಿದ್ದುಪಡಿಗೆ ಬುಧವಾರ ಸುಗ್ರೀವಾಜ್ಞೆ ನೀಡಿದೆ.

ಕೇಂದ್ರ ಸರ್ಕಾರದ ಈ ಸುಗ್ರೀವಾಜ್ಞೆಗೆ ಸಚಿವ ಸಂಪುಟದ ಅನುಮೋದನೆ ದೊರೆತಿದ್ದು, ರಾಷ್ಟ್ರಪತಿಗಳ ಅಂಗೀಕಾರಕ್ಕೆ ರವಾನಿಸಲಾಗಿದೆ. ಕೇಂದ್ರ ಸರ್ಕಾರ ಈ ಸುಗ್ರೀವಾಜ್ಞೆಗೆ 6 ತಿಂಗಳ ಒಳಗಾಗಿ ಸಂಸತ್‌ನಲ್ಲಿ ಅನುಮೋದನೆ ಪಡೆಯಬೇಕಿದೆ.

ಆದಾಗ್ಯೂ ಮಾಲೀಕರು ಉದ್ಯೋಗಿಗಳಿಗೆ ನಗದು ಮೂಲಕ ವೇತನ ಪಾವತಿಸುವ ಆಯ್ಕೆಯನ್ನೂ ನೀಡಲಾಗಿದೆ.

ವೇತನ ಪಾವತಿ (ತಿದ್ದುಪಡಿ) ಮಸೂದೆ, 2016ರ ಪ್ರಧಾನ ಕಾಯಿದೆಯ ವಿಭಾಗ 6 ತಿದ್ದುಪಡಿ ಮೂಲಕ ಮಾಲೀಕರು ತಮ್ಮ ಉದ್ಯೋಗಿಗಳಿಗೆ ಚೆಕ್ ಅಥವಾ ವಿದ್ಯುನ್ಮಾನ ಆಧಾರದಲ್ಲಿ ಅವರ ಖಾತೆಗೆ ವೇತನ ವರ್ಗಾಯಿಸುವ ತಿದ್ದುಪಡಿಯನ್ನು ಸಕ್ರಿಯಗೊಳಿಸಲು ನಿರ್ಧರಿಸಲಾಗಿದೆ.

ಕಾರ್ಮಿಕ ಸಚಿವ ಬಂಡಾರು ದತ್ತಾತ್ರೇಯ ಅವರು ಈ ಮಸೂದೆಯನ್ನು ಪರಿಚಿಯಿಸಿದ್ದಾರೆ.

ಈ ಮಸೂದೆ ರಾಜ್ಯ ಸರ್ಕಾರಗಳಿಗೆ ನಗದು ರಹಿತ ವೇತನ ಪಾವತಿಯನ್ನು ಅನುಸರಿಸುವ ಕೈಗಾರಿಗಳು ಮತ್ತು ಸಂಸ್ಥೆಗಳನ್ನು ಸೂಚಿಸಲು ಅನುಮತಿಸುತ್ತದೆ.

ಇದು ನಗದು ರಹಿತ ಅಥವಾ ಡಿಜಿಟಲ್ ಆರ್ಥಿಕತೆಯ ಉದ್ದೇಶವನ್ನು ನಿರ್ವಹಿಸುತ್ತದೆ ಎಂದು ಮಸೂದೆಯಲ್ಲಿ ಸೂಚಿಸಲಾಗಿದೆ.