ಕೇರಳ: ಅಂತಾರಾಷ್ಟ್ರೀಯ ಕೌಶಲ್ಯ ಸಭೆ ಆಯೋಜನೆ

ತಿರುವನಂತಪುರಂ: ವಿಶ್ವದಾದ್ಯಂತ ಕಂಪೆನಿಗಳ ಮಾಲೀಕರು ತಮ್ಮ ಕಂಪೆನಿಯ ಸಾಮರ್ಥ್ಯ ಹಾಗೂ ಗುಣಮಟ್ಟ ಹೆಚ್ಚಿಸುವ ಸಲುವಾಗಿ ಮತ್ತು ರಾಜ್ಯದ ಯುವ ಜನತೆ ತಮ್ಮ ಉದ್ಯೋಗಾರ್ಹತೆ ಅಭಿವ್ಯಕ್ತಿಗೊಳಿಸಲು ಕೇರಳ ಸರ್ಕಾರ ಇಂಟರ್‌ನ್ಯಾಷನಲ್ ಸ್ಕಿಲ್ ಸಮ್ಮಿಟ್ ಹಾಗೂ ಸ್ಕಿಲ್ ಫೀಯೆಸ್ಟಾ ಕಾರ್ಯಕ್ರಮ ಆಯೋಜಿಸಲಿದೆ.

’ನೈಪುಣ್ಯಂ 2016’ ಹಾಗೂ ಸ್ಕಿಲ್ ಫೀಯೆಸ್ಟಾ ಕಾರ್ಯಕ್ರಮವನ್ನು ಫೆಬ್ರವರಿ 5ರಿಂದ 7ರ ವರೆಗೆ ಉದ್ಯೋಗ ನಿರ್ದೇಶನಾಲಯ ಹಾಗೂ ಕೌಶಲ ಉತ್ಕೃಷ್ಟತಾ ತರಬೇತಿ ಮತ್ತು ಕೇರಳ ಅಕಾಡೆಮಿ ಸಹಭಾಗಿತ್ವದಲ್ಲಿ ಆಯೋಜಿಸಲಿದೆ.

ಕಾರ್ಮಿಕ ಹಾಗೂ ಕೌಶಲ್ಯ ಸಚಿವ ಶಿಬು ಬೇಬಿ ಅವರು ಕಾರ್ಯಕ್ರಮವೊಂದರಲ್ಲಿ ಮುಂಬರುವ ಕೌಶಲ್ಯ ಸಭೆಯ ಲೋಗೋ, ವೆಬ್‌ಸೈಟ್, ಮಾಸ್ಕಾಟ್ ಅನಾವರಣಗೊಳಿಸಿದ್ದಾರೆ.

ಸ್ಕಿಲ್ ಫೀಯೆಸ್ಟಾ 2016ರಲ್ಲಿ ಭಾಗವಹಿಸಲಿರುವವರನ್ನು ಸಾಂಸ್ಥಿಕ ಮಟ್ಟ, ವಲಯ ಮತ್ತು ರಾಜ್ಯ ಮಟ್ಟದಲ್ಲಿ ಮೂರು ಹಂತಗಳ ಪ್ರಕ್ರಿಯೆ ಮೂಲಕ ಆಯ್ಕೆ ಮಾಡಲಾಗುವುದು ಎಂದು ಕಾರ್ಮಿಕ ಇಲಾಖೆಯ ಪ್ರಧಾನ ಕಾರ್ಯದರ್ಶಿ ಟಾಮ್ ಜೋಸ್ ಹೇಳಿದ್ದಾರೆ.

ಸುಮಾರು 25 ವರ್ಷದೊಳಗಿನ ಕಲಿಯುತ್ತಿರುವ ಮತ್ತು ಕಲಿಕೆ ಪೂರ್ಣಗೊಳಿಸಿರುವ ವಿದ್ಯಾರ್ಥಿಗಳು  ಬೆಸುಗೆ (ವೆಲ್ಡಿಂಗ್), ಪ್ಲಂಬಿಂಗ್, ಫ್ಯಾಶನ್ ತಂತ್ರಜ್ಞಾನ, ಕ್ಯಾಟರಿಂಗ್ ಹಾಗೂ ರೆಸ್ಟೋರೆಂಟ್ ಸೇವೆ, ಮೊಬೈಲ್ ರೋಬೋಟಿಕ್ಸ್, ತಂತ್ರಜ್ಞಾನ ಮತ್ತು ಕಂಪ್ಯೂಟರ್, ಬಡಗಿ, ಬೇಕರಿ, ಎಲೆಟ್ರಿಷಿಯನ್ ಮೊದಲಾದ ವಿಭಾಗಗಳಲ್ಲಿ ವಿವಿಧ ಕಂಪೆನಿಗಳ ಮೂಲಕ ಸ್ಪರ್ಧಿಸಲು ಆಹ್ವಾನಿಸಲಾಗುವುದು ಎಂದು ಜೋಸ್ ತಿಳಿಸಿದ್ದಾರೆ.