“ಅರುಣಾಚಲ ಟಿಬೆಟ್‌ ಜೊತೆ ಮಾತ್ರ ಭೂ ಗಡಿ ಹಂಚಿಕೊಳ್ಳುತ್ತದೆ, ಚೀನಾ ಜೊತೆ ಅಲ್ಲ”- ಖಂಡು ಖಡಕ್‌ ಮಾತು

ನವದೆಹಲಿ: ಅರುಣಾಚಲ ಪ್ರದೇಶದ ಮುಖ್ಯಮಂತ್ರಿ ಪೆಮಾ ಖಂಡು ಅವರು ಬುಧವಾರ ಚೀನಾಗೆ ತಿರುಗೇಟು ನೀಡಿದ್ದು,  ಈಶಾನ್ಯ ರಾಜ್ಯವು ಟಿಬೆಟ್‌ನೊಂದಿಗೆ ಮಾತ್ರ ಭೂ ಗಡಿಯನ್ನು ಹಂಚಿಕೊಳ್ಳುತ್ತದೆ ಚೀನಾದೊಂದಿಗೆ ಅಲ್ಲ ಎಂದಿದ್ದಾರೆ.

ಅರುಣಾಚಲ ಪ್ರದೇಶವು ಚೀನಾದೊಂದಿಗೆ 1,200 ಕಿಮೀ ಗಡಿಯನ್ನು ಹಂಚಿಕೊಂಡಿದೆ ಎಂದು ಆ ದೇಶ ಕೇಳಿಕೊಂಡಿದೆ.  ಇದಕ್ಕೆ ತೀಕ್ಷ್ಣವಾಗಿ ಪ್ರತಿಕ್ರಿಯೆ ನೀಡಿರುವ ಖಂಡು ಅವರು, ಚೀನಾದೊಂದಿಗೆ ಭಾರತದ ಯಾವುದೇ ರಾಜ್ಯ ಗಡಿ ಹಂಚಿಕೊಳ್ಳುವುದಿಲ್ಲ ಎಂದಿದ್ದಾರೆ

“ಅವರ ಹೇಳಿಕೆಯನ್ನು ನಾನು ಸರಿಪಡಿಸುತ್ತೇನೆ. ನಾವು ಟಿಬೆಟ್‌ನೊಂದಿಗೆ ಗಡಿಯನ್ನು ಹಂಚಿಕೊಳ್ಳುತ್ತೇವೆ, ಚೀನಾದೊಂದಿಗೆ ಅಲ್ಲ” ಎಂದಿದ್ದಾರೆ.

ಯಾವುದೇ ಭಾರತೀಯ ರಾಜ್ಯವು ಚೀನಾದೊಂದಿಗೆ ಭೂ ಗಡಿಯನ್ನು ಹಂಚಿಕೊಳ್ಳುವುದಿಲ್ಲ, ಟಿಬೆಟ್‌ ಅನ್ನು 1950 ರ ದಶಕದಲ್ಲಿ ಚೀನಾ ಬಲವಂತವಾಗಿ ಆಕ್ರಮಿಸಿಕೊಂಡಿದೆ ಎಂದಿದ್ದಾರೆ.

“ಅಧಿಕೃತವಾಗಿ, ಹೌದು, ಟಿಬೆಟ್ ಈಗ ಚೀನಾದ ಅಡಿಯಲ್ಲಿದೆ. ಅದನ್ನು ನಿರಾಕರಿಸಲಾಗುವುದಿಲ್ಲ. ಆದರೆ ಮೂಲತಃ ನಾವು ಟಿಬೆಟ್‌ನೊಂದಿಗೆ ಗಡಿಯನ್ನು ಹಂಚಿಕೊಂಡಿದ್ದೇವೆ. ಮತ್ತು ಅರುಣಾಚಲ ಪ್ರದೇಶದಲ್ಲಿ ನಾವು ಕೇವಲ ಮೂರು ಅಂತರರಾಷ್ಟ್ರೀಯ ಗಡಿಗಳನ್ನು ಹಂಚಿಕೊಳ್ಳುತ್ತೇವೆ. ಭೂತಾನ್ ಜೊತೆ, ಸರಿಸುಮಾರು 150 ಕಿ.ಮೀ; ಪೂರ್ವ ಭಾಗದಲ್ಲಿ ಮ್ಯಾನ್ಮಾರ್ ಜೊತೆ ಸುಮಾರು 550 ಕಿ.ಮೀ. ಮತ್ತು  ಟಿಬೆಟ್‌ ಅತಿ ಉದ್ದದ ಗಡಿ ಹಂಚಿಕೊಳ್ಳುತ್ತೇವೆ” ಎಂದಿದ್ದಾರೆ.

ಲಡಾಖ್, ಹಿಮಾಚಲ ಪ್ರದೇಶ ಮತ್ತು ಉತ್ತರಾಖಂಡದ ಪ್ರದೇಶಗಳನ್ನು ಒಳಗೊಂಡಂತೆ – ಇಡೀ ಅರುಣಾಚಲ ಪ್ರದೇಶದ ಮೇಲೆ ಹಕ್ಕು ಸಾಧಿಸುವ ಮೂಲಕ – ಭಾರತೀಯ ಭೂಪ್ರದೇಶವನ್ನು ವಶಪಡಿಸಿಕೊಳ್ಳಲು ಚೀನಾ ಪದೇ ಪದೇ ಪ್ರಯತ್ನಿಸುತ್ತಿರುವ ಮಧ್ಯೆ ಖಂಡು ಅವರಿಂದ ತೀಕ್ಷ್ಣವಾದ ಉತ್ತರ ಬಂದಿದೆ.