ಪಂಜಾಬ್‌ನ ಮತಾಂತರಗೊಂಡ ಸ್ವಯಂ ಘೋಷಿತ ಕ್ರೈಸ್ಥ ಪಾದ್ರಿ ಬಜಿಂದರ್‌ ಸಿಂಗ್‌ ವಿರುದ್ಧ ಪ್ರಕರಣ

ಚಂಡೀಗಢ: ಪಂಜಾಬ್‌ನ ಮತಾಂತರಗೊಂಡ ಸ್ವಯಂ ಘೋಷಿತ ಕ್ರೈಸ್ಥ ಪಾದ್ರಿ ಬಜಿಂದರ್ ಸಿಂಗ್ ಮಹಿಳೆ ಸೇರಿದಂರೆ ಇಬ್ಬರ ಮೇಲೆ ಹಲ್ಲೆ ನಡೆಸಿದ ಪ್ರಕರಣಕ್ಕೆ ಸಂಬಂಧಿಸಿದಂತೆ ಈಗ ಪೊಲೀಸರ ಅತಿಥಿಯಾಗಿದ್ದಾನೆ. ಪ್ರಾರ್ಥನಾ ಸಭೆಯಲ್ಲೇ ಈತ ಮಹಿಳೆಯ ಮೇಲೆ ಹಲ್ಲೆ ನಡೆಸಿರುವುದು ಕ್ಯಾಮೆರಾದಲ್ಲಿ ಸೆರೆಯಾಗಿದೆ.  ಬಜಿಂದರ್‌ ಪ್ರಾರ್ಥನೆಯ ವೇಳೆ ಕೆಟ್ಟದಾಗಿ ನಡೆಸಿಕೊಂಡು ನನ್ನ ಮೇಲೆ ಹಲ್ಲೆ ನಡೆಸಿದ್ದಾನೆ ಎಂದು ಮಹಿಳೆ ಆರೋಪಿಸಿದ್ದಾರೆ.

ಈತನ ವಿರುದ್ಧ ಪ್ರಕರಣ ದಾಖಲಾಗಿದ್ದು, ಪೊಲೀಸರು ತನಿಖೆ ಆರಂಭಿಸಿದ್ದಾರೆ. ಈತ ಅಪರಾಧ ಪ್ರಕರಣಗಳಲ್ಲಿ ಭಾಗಿಯಾಗುತ್ತಿರುವುದು ಇದೇ ಮೊದಲಲ್ಲ. ಈ ಹಿಂದೆಯೂ ಅನೇಕ ಪ್ರಕರಣಗಳು ಈತನ ಮೇಲೆ ದಾಖಲಾಗಿದ್ದು, ಜೈಲು ಶಿಕ್ಷೆಯನ್ನೂ ಈತ ಅನುಭವಿಸಿದ್ದಾರೆ.

45 ವರ್ಷದ ಬಜಿಂದರ್‌ ಮೇಲೆ 2017 ರಲ್ಲೂ ಲೈಂಗಿಕ ಕಿರುಕುಳ ನೀಡಿದ ಪ್ರಕರಣ ದಾಖಲಾಗಿತ್ತು. ಅಷ್ಟೇ ಅಲ್ಲದೇ ವಂಚನೆಯ ಹಲವು ಪ್ರಕರಣಗಳೂ ಈತನ ಮೇಲೆ ದಾಖಲಾಗಿವೆ. ಆದಾಯ ತೆರಿಗೆ ಇಲಾಖೆ ಕೂಡ ಈತ ಮೇಲೆ ದಾಳಿ ನಡೆಸಿತ್ತು.  2018 ರಲ್ಲಿ, ವಿದೇಶ ಪ್ರವಾಸಕ್ಕೆ ಸಹಾಯ ಮಾಡುವುದಾಗಿ ಸುಳ್ಳು ಭರವಸೆ ನೀಡಿ ಪಂಜಾಬ್‌ನ ಜಿರಾಕ್‌ಪುರದ ಮಹಿಳೆಯೊಬ್ಬರನ್ನು ಅತ್ಯಾಚಾರ ಮಾಡಿದ ಆರೋಪದ ಮೇಲೆ ಇವನನ್ನು ಬಂಧನವೂ ಮಾಡಲಾಗಿತ್ತು.

ಇನ್ನೂ ಕುತೂಹಲದ ವಿಷಯವೆಂದರೆ ಹಿಂದೂ ಜಾಟ್ ಕುಟುಂಬದಲ್ಲಿ ಜನಿಸಿದ ಬಜೀಂದರ್ 2000 ರ ದಶಕದಲ್ಲಿ ಕೊಲೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಜೈಲು ವಾಸ ಅನುಭವಿಸುತ್ತಿದ್ದಾಗಲೇ ಕ್ರಿಶ್ಚಿಯನ್ ಧರ್ಮಕ್ಕೆ ಮತಾಂತರಗೊಂಡಿದ್ದ. ಜೈಲಿನಿಂದ ಹೊರಗೆ ಬಂದು ಕ್ರೈಸ್ಥ ಪಾದ್ರಿಯಾಗಿ ಬದಲಾಗಿ ʼಯೇಸು ಯೇಸು ಪ್ರಾಫೆಟ್‌ʼ ಎಂದು ಫೇಮಸ್‌ ಆಗಿ ಧಾರ್ಮಿಕ ಸಭೆಗಳನ್ನು ಆಯೋಜಿಸುತ್ತಿದ್ದ, ಮಾತ್ರವಲ್ಲೇ ಮತಾಂತರಕ್ಕೂ ಈತ ಕುಮ್ಮಕ್ಕು ನೀಡುತ್ತಿದ್ದಾನೆ ಎಂಬ ಆರೋಪವಿದೆ. ಇದೀಗ ಮತ್ತೆ ಮಹಿಳೆಯ ಮೇಲೆ ಹಲ್ಲೆ ನಡೆಸಿ ಜೈಲಿಗೆ ಸೇರುವ ಸನಿಹದಲ್ಲಿದ್ದಾನೆ.