ದೆಹಲಿ: ‘ಶೀಶ್ ಮಹಲ್’ ಅನ್ನು ದೆಹಲಿ ಅತಿಥಿ ಗೃಹವನ್ನಾಗಿ ಪರಿವರ್ತಿಸಲು ಬಿಜೆಪಿ ಯೋಜನೆ

ನವದೆಹಲಿ: ದೆಹಲಿ ಬಿಜೆಪಿ ಸರ್ಕಾರವು ಮಾಜಿ ಮುಖ್ಯಮಂತ್ರಿ ಅರವಿಂದ್‌ ಕೇಜ್ರಿವಾಲ್‌ ಅವರ ‘ಶೀಶ್ ಮಹಲ್’ ಎಂದು ಕರೆಯಲ್ಪಡುವ 6, ಫ್ಲಾಗ್ ಸ್ಟಾಫ್ ರಸ್ತೆಯಲ್ಲಿರುವ ಬಂಗಲೆಯನ್ನು ರಾಜ್ಯದ ಅತಿಥಿ ಗೃಹವಾಗಿ ಬಳಸಲು ಯೋಜಿಸುತ್ತಿದೆ.

ಅರವಿಂದ್ ಕೇಜ್ರಿವಾಲ್ 2015 ರಿಂದ ಅಕ್ಟೋಬರ್ 2024 ರವರೆಗೆ ಈ ಬಂಗಲೆಯಲ್ಲಿ ವಾಸಿಸುತ್ತಿದ್ದರು, ಕಂಟ್ರೋಲರ್ ಆಂಡ್ ಆಡಿಟರ್ ಜನರಲ್ (ಸಿಎಜಿ) ವರದಿಯ ಪ್ರಕಾರ,ಇದರ ನವೀಕರಣಕ್ಕಾಗಿ  ಅವರು 33.66 ಕೋಟಿ ರೂಪಾಯಿಗಳನ್ನು ಖರ್ಚು ಮಾಡಿದ್ದರು.

ಫೆಬ್ರವರಿಯಲ್ಲಿ ನಡೆದ ದೆಹಲಿ ವಿಧಾನಸಭಾ ಚುನಾವಣೆಯ ಪ್ರಚಾರದ ಸಮಯದಲ್ಲಿ ಸಾರ್ವಜನಿಕ ಹಣದ ಈ ದುಂದುವೆಚ್ಚಕ್ಕಾಗಿ ಬಿಜೆಯು ಕೇಜ್ರಿವಾಲ್ ಅವರನ್ನು ತೀವ್ರವಾಗಿ ಟೀಕಿಸಿತ್ತು. ಅಲ್ಲದೇ ಅಧಿಕಾರಕ್ಕೆ ಬಂದ ಬಳಿಕ ಬಿಜೆಪಿ ಸಿಎಂ ಕೇಜ್ರಿವಾಲ್‌ ಅವರ ಈ ‘ಶೀಶ್ ಮಹಲ್’ನಲ್ಲಿ ವಾಸಿಸುವುದಿಲ್ಲ ಎಂದು ಪ್ರತಿಜ್ಞೆ ಮಾಡಿತ್ತು.

ಹೀಗಾಗಿ, ರೇಖಾ ಗುಪ್ತಾ ಮುಖ್ಯಮಂತ್ರಿಯಾದ ನಂತರ ಶಾಲಿಮಾರ್ ಬಾಗ್‌ನಲ್ಲಿರುವ ಅವರ ಕುಟುಂಬದ ಮನೆಯಲ್ಲಿಯೇ ವಾಸಿಸುತ್ತಿದ್ದಾರೆ, ಹೀಗಾಗಿ ಬಿಜೆಪಿ ಸರ್ಕಾರ ‘ಶೀಶ್ ಮಹಲ್’ ಆಗಿ ಪರಿವರ್ತನೆಗೊಂಡಿರುವ  ಸಂಪನ್ಮೂಲವನ್ನು ಬಳಸಿಕೊಳ್ಳುವ ಮಾರ್ಗಗಳ ಬಗ್ಗೆ ಯೋಚಿಸುತ್ತಿದೆ.

“ಇತರ ರಾಜ್ಯಗಳಂತೆ ದೆಹಲಿಗೆ ರಾಜ್ಯ ಅತಿಥಿ ಗೃಹ ಇಲ್ಲ. ಹೀಗಾಗಿ 6, ಫ್ಲಾಗ್ ಸ್ಟಾಫ್ ರಸ್ತೆ ಆಸ್ತಿಯನ್ನು ಅಂತಹ ಸೌಲಭ್ಯವನ್ನಾಗಿ ಪರಿವರ್ತಿಸುವ ಬಗ್ಗೆ ಚಿಂತನೆ ನಡೆಸಲಾಗುತ್ತಿದೆ, ಅದು ಆಕ್ರಮಿಸಿಕೊಂಡಿರುವ ಪ್ರದೇಶ ಮತ್ತು ಸ್ಥಳವನ್ನು ಗಮನದಲ್ಲಿಟ್ಟುಕೊಂಡು ನಿರ್ಧಾರ ತೆಗೆದುಕೊಳ್ಳಲಾಗುತ್ತದೆ” ಎಂದು ಅಧಿಕಾರಿಯೊಬ್ಬರು ದೆಹಲಿಯಲ್ಲಿ ರಾಜ್ಯ ಅತಿಥಿ ಗೃಹದ ಅಗತ್ಯವನ್ನು ಒತ್ತಿ ಹೇಳಿದರು.

6, ಫ್ಲಾಗ್ ಸ್ಟಾಫ್ ರಸ್ತೆಯಲ್ಲಿರುವ ಬಂಗಲೆಯನ್ನು ಮೊದಲು 1942 ರಲ್ಲಿ ಐದು ಮಲಗುವ ಕೋಣೆಗಳು ಮತ್ತು ಕಚೇರಿ ಸ್ಥಳದೊಂದಿಗೆ ನಿರ್ಮಿಸಲಾಯಿತು, ಇದು ಲುಟಿಯೆನ್ಸ್ ದೆಹಲಿ ಪ್ರದೇಶದ ಹೊರಗಿನ ಅತಿದೊಡ್ಡ ಆಸ್ತಿಗಳಲ್ಲಿ ಒಂದಾಗಿದೆ.