ಪ್ರಸಕ್ತ ಶೈಕ್ಷಣಿಕ ವರ್ಷದ ಆನ್‌ಲೈನ್, ಆಫ್‌ಲೈನ್ ಬೋಧನೆಗೆ ಮಾರ್ಗಸೂಚಿ

ಬೆಂಗಳೂರು: ಈ ವರ್ಷದ ಶೈಕ್ಷಣಿಕ ಚಟುವಟಿಕೆ‌ಗಳಿಗೆ ಸಂಬಂಧಿಸಿದಂತೆ ಅಫ್‌ಲೈನ್, ಆನ್‌ಲೈನ್ ಬೋಧನೆಗೆ ಸಂಬಂಧಿಸಿದಂತೆ ಸಾರ್ವಜನಿಕ ಶಿಕ್ಷಣ ಇಲಾಖೆ ಹೊಸ ಮಾರ್ಗಸೂಚಿ‌ಗಳನ್ನು ಪ್ರಕಟಿಸಿದೆ.

ಮೊಬೈಲ್ ಫೋನ್, ದೂರದರ್ಶನ ಸಂಪರ್ಕ ಹೊಂದಿರುವ ವಿದ್ಯಾರ್ಥಿಗಳು, ಈ ಯಾವುದೇ ವ್ಯವಸ್ಥೆ ಹೊಂದಿರದ ವಿದ್ಯಾರ್ಥಿಗಳನ್ನು ಕಲಿಕೆಯಲ್ಲಿ ತೊಡಗಿಸಿಕೊಳ್ಳುವುದಕ್ಕೆ ಸಂಬಂಧಿಸಿದಂತೆ ಮಾರ್ಗಸೂಚಿ‌ಯಲ್ಲಿ ಹೇಳಲಾಗಿದೆ. 1 -10 ನೇ ತರಗತಿ ವಿದ್ಯಾರ್ಥಿಗಳ ಪೋಷಕರಲ್ಲಿರುವ ತಾಂತ್ರಿಕ ಸಾಧನಗಳ ಲಭ್ಯತೆಯ ಮಾಹಿತಿ ಸಂಗ್ರಹಿಸಬೇಕು. ಇಲ್ಲವೇ ಅವರಿಗೆ ಮನೆಯ ಸಮೀಪವೇ ಶೈಕ್ಷಣಿಕ ಬೆಂಬಲ ನೀಡಲು ಬಯಸುವ ಸಹೃದಯರನ್ನು ಗುರುತಿಸಿ ಮಕ್ಕಳಿಗೆ ಕಲಿಕೆಗೆ ಅನುಕೂಲ ಕಲ್ಪಿಸಲು ಮಾರ್ಗಸೂಚಿ ತಿಳಿಸಿದೆ.

ಯಾವುದೇ ಫೋನ್, ದೂರದರ್ಶನ ಸೌಲಭ್ಯ ಹೊಂದಿರದ ವಿದ್ಯಾರ್ಥಿಗಳಿಗೆ ಹತ್ತಿರದ ಮನೆಯವರ ಸಮ್ಮತಿ ಪಡೆದು ಚಂದನ ವಾಹಿನಿಯಲ್ಲಿ ಪ್ರಸಾರವಾಗುವ ಪಾಠಗಳನ್ನು ವೀಕ್ಷಿಸಲು ಕ್ರಮ ಕೈಗೊಳ್ಳುವಂತೆ ತಿಳಿಸಲಾಗಿದೆ. ಮನೆಯಲ್ಲಿ ರೇಡಿಯೋ ಇದ್ದಲ್ಲಿ ಅದರ ಮೂಲಕ ಪ್ರಸಾರವಾಗುವ ಪಾಠಗಳನ್ನು ಮನನ ಮಾಡಿಕೊಳ್ಳಲು ಮಾರ್ಗದರ್ಶನ ನೀಡುವಂತೆ ಸೂಚಿಸಲಾಗಿದೆ.

ಹಾಗೆಯೇ ಪ್ರತಿ ವಿದ್ಯಾರ್ಥಿಗೆ ವಿಷಯವಾರು ಕೃತಿ ಸಂಪುಟ ನಿರ್ವಹಣೆ ಮಾಡಿ, ಮೌಲ್ಯಮಾಪನ ನಡೆಸಬೇಕಿದೆ. ಇದರ ವಿವರ‌ಗಳನ್ನು ಕಡ್ಡಾಯವಾಗಿ ಸ್ಯಾಟ್ಸ್ ತಂತ್ರಾಂಶದಲ್ಲಿ ಅಳವಡಿಸಬೇಕೆಂದು ಮಾರ್ಗಸೂಚಿ‌ಯಲ್ಲಿ ಇಲಾಖೆ ಸ್ಪಷ್ಟವಾಗಿ ತಿಳಿಸಿದೆ. ಹಾಗೆಯೇ ಇವೆಲ್ಲವುಗಳ ಬಗ್ಗೆ ಗಮನ ನೀಡಲು ಪ್ರತಿ ಜಿಲ್ಲೆಯಲ್ಲಿ ನೊಡಲ್ ಅಧಿಕಾರಿಗಳನ್ನು ನೇಮಿಸಲಾಗಿದೆ.

ಜುಲೈ ಒಂದರಿಂದ 2021-22 ನೇ ಸಾಲಿನ ಶೈಕ್ಷಣಿಕ ವರ್ಷ ಆರಂಭವಾಗಲಿದೆ.