ಗ್ರಾಮೀಣ ಭಾಗಗಳಲ್ಲಿ ಕೊರೋನಾ ನಿಯಂತ್ರಣಕ್ಕೆ ಮೊಬೈಲ್ ಘಟಕ ಆರಂಭಿಸಲು ಯೋಜನೆ

ಬೆಂಗಳೂರು: ನಗರದಲ್ಲಿ ಕೊರೋನಾ ಸೋಂಕಿನ ಅಬ್ಬರ ಕಡಿಮೆಯಾಗುತ್ತಿದ್ದಂತೆ ಗ್ರಾಮೀಣ ಭಾಗಗಳಲ್ಲಿ ಕೊರೋನಾ ಅಟ್ಟಹಾಸ ಜೋರಾಗುತ್ತಿದೆ. ಈ ಹಿನ್ನೆಲೆಯಲ್ಲಿ ಮೊಬೈಲ್ ಘಟಕಗಳ ಮೂಲಕ ಸೋಂಕು ನಿಯಂತ್ರಣ ಮಾಡಲು ರಾಜ್ಯ ಸರ್ಕಾರ ಮುಂದಾಗಿದೆ.

ವಾರದಲ್ಲಿ ಗ್ರಾಮೀಣ ಭಾಗದ 1500 ಜನರನ್ನು ತಲುಪುವುದು ಈ ಯೋಜನೆಯ ಉದ್ದೇಶ‌ವಾಗಿದೆ. ಪ್ರತೀ ಜಿಲ್ಲೆಗೆ 15 – 20 ರಷ್ಟು ವಾಹನಗಳು ತೆರಳಲಿದ್ದು ಪ್ರತಿ ವಾಹನ ವಾರದಲ್ಲಿ ಮೂರು ಗ್ರಾಮಗಳಲ್ಲಿ ಸೇವೆ ನೀಡಲಿದೆ. ಆರಂಭಿಕ ಹಂತದಲ್ಲಿ ಬೆಂಗಳೂರಿನ ಗ್ರಾಮೀಣ ಭಾಗಗಳಲ್ಲಿ 15 ವಾಹನಗಳು ಕಾರ್ಯ ನಿರ್ವಹಿಸುತ್ತಿವೆ. ಪ್ರತಿನಿತ್ಯ ಈ ವಾಹನಗಳು ಸೇವೆ ಮುಗಿಸಿ ಜಿಲ್ಲಾ ಪ್ರಧಾನ ಕಚೇರಿ‌ಗೆ ಸಂಜೆ ವೇಳೆ ಮರಳಲಿವೆ.

ಈ ಮೊಬೈಲ್ ಘಟಕಗಳು ಸೋಂಕಿತರಿಗೆ ಔಷಧಗಳನ್ನು, ಚಿಕಿತ್ಸೆ ನೀಡುವುದರ ಜೊತೆಗೆ, ಸೋಂಕಿತರಿಗೆ ಕೌನ್ಸಲಿಂಗ್ ನಡೆಸುವ ಕಾರ್ಯ ಸಹ ಮಾಡಲಿದೆ. ರಾಜ್ಯಾದ್ಯಂತ ಈ ಕಾರ್ಯಕ್ರಮ‌ವನ್ನು ಯಶಸ್ವಿಯಾಗಿ ಜಾರಿಗೊಳಿಸುವಂತೆ ಸರ್ಕಾರ ಎಲ್ಲಾ ಜಿಲ್ಲಾಧಿಕಾರಿ‌ಗಳಿಗೂ ಸೂಚನೆ ನೀಡಿದೆ. ಇದರಲ್ಲಿ 2500 ಪಿಜಿ ಮತ್ತು ಅಂತಿಮ ವರ್ಷದ ಎಂಬಿಬಿಎಸ್ ವಿದ್ಯಾರ್ಥಿಗಳು ಕರ್ತವ್ಯ ನಿರ್ವಹಿಸಲಿದ್ದಾರೆ. ಇದನ್ನು ಇಂಟರ್ನ್‌ಶಿಪ್ ಎಂದು ಪರಿಗಣಿಸಿ ಪ್ರಮಾಣ ಪತ್ರ ನೀಡಲಾಗುತ್ತದೆ ಎಂದು ಸರ್ಕಾರ ಹೇಳಿದೆ.