2022 ರ ಫೆಬ್ರವರಿ‌ಯಲ್ಲಿ ಬೆಂಗಳೂರು-ಮೈಸೂರು ಎಕ್ಸ್‌ಪ್ರೆಸ್ ವೇ ಸಂಪೂರ್ಣ: ಕಾರಜೋಳ

ಬೆಂಗಳೂರು: ಮೈಸೂರು – ಬೆಂಗಳೂರು ಎಕ್ಸ್‌ಪ್ರೆಸ್ ವೇ ಎಂದೇ ಜನಜನಿತವಾಗಿರುವ ಮೈಸೂರು- ಬೆಂಗಳೂರು ಎಕನಾಮಿಕ್ ಕಾರಿಡಾರ್ ಪ್ರಾಜೆಕ್ಟ್‌ನ 55% ಗಳಷ್ಟು ಕೆಲಸಗಳು ಸಂಪೂರ್ಣ‌ವಾಗಿದ್ದು, ಇದನ್ನು 2022 ರ ಫೆಬ್ರವರಿ ಸಂದರ್ಭದಲ್ಲಿ ಲೋಕಾರ್ಪಣೆ ಮಾಡಲಾಗುವುದು ಎಂದು ಡಿಸಿಎಂ ಗೋವಿಂದ ಕಾರಜೋಳ ತಿಳಿಸಿದ್ದಾರೆ.

2022 ರ ಸೆಪ್ಟೆಂಬರ್ ತಿಂಗಳಿಗೆ ಈ ಯೋಜನೆ ಪೂರ್ಣಗೊಳ್ಳಲು ಸಮಯ ನಿಗದಿ ಮಾಡಲಾಗಿದೆ. ಆದರೆ ನಿಗದಿತ ಅವಧಿಗೂ ಮೊದಲೇ ಈ ಯೋಜನೆ ಸಂಪೂರ್ಣಗೊಳ್ಳಲಿದೆ, ಲೋಕಾರ್ಪಣೆಯಾಗಲಿದೆ ಎಂದು ಅವರು ತಿಳಿಸಿದ್ದಾರೆ.

ಭಾರತ್‌ಮಾಲಾ ಪರಿಯೋಜನೆಯ 1 ನೇ ಹಂತದಡಿಯಲ್ಲಿ ಈ ಕಾಮಗಾರಿ ಕೈಗೆತ್ತಿಕೊಳ್ಳಲಾಗಿದ್ದು, ಎರಡು ಪ್ಯಾಕೇಜ್‌ಗಳನ್ನು ಬಳಸಿ 7400 ಕೋಟಿ ರೂ. ಗಳಲ್ಲಿ ಈ ಯೋಜನೆಯನ್ನು ಅಭಿವೃದ್ಧಿ ಮಾಡಲಾಗುತ್ತಿದೆ. ಬೆಂಗಳೂರಿನಿಂದ ಮದ್ದೂರು ತಾಲೂಕಿನ ನಿಡ್ಲಘಟ್ಟದ ವರೆಗೆ ಸುಮಾರು 3000 ಕೋಟಿ ರೂ. ಗಳಲ್ಲಿ ಮೊದಲ ಹಂತ ಮತ್ತು ನಿಡ್ಲಘಟ್ಟದಿಂದ ಮೈಸೂರಿನ ವರೆಗೆ 3400 ಕೋಟಿ ರೂ.ಗಳಲ್ಲಿ ಎರಡನೇ ಹಂತದಲ್ಲಿ ಈ ಕಾಮಗಾರಿ ನಡೆಸಲಾಗುತ್ತಿದೆ.

ಈ ಕಾಮಗಾರಿಯ ಗುತ್ತಿಗೆ‌ಯನ್ನು ಭೋಪಾಲ್ ಮೂಲದ ದಿಲೀಪ್ ಬಿಲ್ಡ್‌ಕಾನ್‌ಗೆ ವಹಿಸಲಾಗಿದೆ. ಮುಂದಿನ 11 ತಿಂಗಳಲ್ಲಿ ಈ ಕಾಮಗಾರಿ ಸಂಪೂರ್ಣವಾಗಲಿದ್ದು, ವಿಶ್ವಮಟ್ಟದ ಮಾನದಂಡಗಳಿಗೆ ಅನುಗುಣವಾಗಿ ಈ ರಸ್ತೆ ನಿರ್ಮಾಣ ಕಾರ್ಯ ನಡೆಯುತ್ತಿದೆ. ಸಮರೋಪಾದಿಯಲ್ಲಿ ಈ ಯೋಜನೆಯ ಕಾರ್ಯಗಳು ನಡೆಯುತ್ತಿದೆ ಎಂದು ಕಾರಜೋಳ ಹೇಳಿದ್ದಾರೆ.

ಈಗಾಗಲೇ ಮೊದ ಪ್ಯಾಕೇಜ್‌ನ 67.5% ಮತ್ತು ಎರಡನೇ ಪ್ಯಾಕೇಜ್‌ನ 50.5% ಗಳಷ್ಟು ಕಾಮಗಾರಿ ಮುಗಿದಿದೆ. ಈ ಯೋಜನೆ ಸಂಪೂರ್ಣ‌ಗೊಂಡು ಲೋಕಾರ್ಪಣೆಯಾದ ಬಳಿಕ ಎರಡು ನಗರಗಳ ನಡುವಿನ ಸಂಚಾರಕ್ಕೆ 90 ನಿಮಿಷ‌ಗಳು ಸಾಕಾಗಲಿವೆ. ಇದರಲ್ಲಿ ಒಂಬತ್ತು ಪ್ರಮುಖ ಸೇತುವೆ‌ಗಳು, 44 ಸಣ್ಣ ಸೇತುವೆಗಳು, 4 ಓವರ್ ಬ್ರಿಡ್ಜ್‌ಗಳು ಸೇರಿವೆ ಎಂದು ಡಿಸಿಎಂ ತಿಳಿಸಿದ್ದಾರೆ. ಹಾಗೆಯೇ ಬೆಂಗಳೂರು ಹೊರವಲಯದಲ್ಲಿ 5 ಕಿಮೀ, ಮದ್ದೂರಿನಲ್ಲಿ 3 ಕಿಮೀ, ಶ್ರೀರಂಗಪಟ್ಟಣ‌ದಲ್ಲಿ ಎತ್ತರದ ಕಾರಿಡಾರ್‌ಗಳ ನಿರ್ಮಾಣವಾಗಲಿದೆ ಎಂದು ತಿಳಿಸಿದ್ದಾರೆ.

ರಸ್ತೆ ಕಾಮಗಾರಿ ಸಂಪೂರ್ಣ‌ವಾದ ಬಳಿಕ ಟೋಲ್‌ಗಳ ಬಗ್ಗೆ ನಿರ್ಧರಿಸಲಾಗುತ್ತದೆ. ಇದು ಗ್ರಾಮಸ್ಥರ ಸಂಚಾರಕ್ಕೂ ಅನುಕೂಲ ಒದಗಿಸಲಿದೆ ಎಂದು ಕಾರಜೋಳ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.