ಕೊರೋನಾ ಸೋಂಕು ನಿವಾರಣೆಗೆ ಭಾರತದ 30 ಲಸಿಕೆಗಳು ಅಭಿವೃದ್ಧಿ ಹಂತದಲ್ಲಿವೆ

ನವದೆಹಲಿ: ಜಗತ್ತು ಕೊರೋನಾ ವೈರಸ್‌ನಿಂದಾಗಿ ಬಳಲುತ್ತಿದೆ. ಭಾರತದಲ್ಲಿಯೂ ಈ ಮಾರಣಾಂತಿಕ ಸೋಂಕಿನ ಕಾರಣಕ್ಕೆ ಆರೋಗ್ಯ, ಆರ್ಥಿಕ, ಆಹಾರ ಅಭದ್ರತೆ ಆರಂಭವಾಗಿದೆ. ಈ ಸೋಂಕಿನ ನಿರ್ಮೂಲನೆಗೆ ಎಲ್ಲಾ ರಾಷ್ಟ್ರಗಳೂ ಔಷಧ ಕಂಡುಹಿಡಿಯಲು ಪ್ರಯತ್ನಿಸುತ್ತಿದ್ದೂ, ಭಾರತದಲ್ಲಿಯೂ ಸಂಶೋಧಕರು ಈ ಕಾರ್ಯದಲ್ಲಿ ತೊಡಗಿದ್ದಾರೆ.

ಈ ಕುರಿತಂತೆ ಔಷಧ ಅಭಿವೃದ್ಧಿ ಪಡಿಸುತ್ತಿರುವ ಭಾರತೀಯ ಟಾಸ್ಕ್ ಫೋರ್ಸ್­ಗಳ ಜೊತೆಗೆ ಪ್ರಧಾನಿ ಮೋದಿ ಚರ್ಚೆ ನಡೆಸಿದ್ದಾರೆ. ಈಗಾಗಲೇ ಲಭ್ಯವಿರುವ 30 ಲಸಿಕೆಗಳನ್ನು ಅಭಿವೃದ್ಧಿ ಮಾಡಲಾಗುತ್ತಿದ್ದು, ಕೊರೋನಾ ವ್ಯಾಕ್ಸಿನ್­ಗಳಾಗಿ ಬಳಕೆ ಮಾಡಬಹುದಾಗಿದೆ ಎಂದೂ ತಜ್ಞರು ಮೋದಿಗೆ ಮಾಹಿತಿ ನೀಡಿದ್ದಾರೆ.

ಕೊರೋನಾ ಲಸಿಕೆ ಅಭಿವೃದ್ಧಿ ಮಾಡುತ್ತಿರುವ ವಿಜ್ಞಾನಿಗಳಿಂದ ಈ ಸಂಬಂಧ ಮಾಹಿತಿ ಪಡೆದಿದ್ದು, ಸುಮಾರು 30 ರಷ್ಟು ಭಾರತೀಯ ಲಸಿಕೆಗಳನ್ನು ಕೊರೋನಾ ವಿರುದ್ಧ ಬಳಕೆ ಮಾಡಲು ಅಭಿವೃದ್ಧಿ ಮಾಡಲಾಗುತ್ತಿದ್ದು, ಈ ಕುರಿತಂತೆ ಕೆಲಸಗಳು ನಡೆಯುತ್ತಿರುವುದಾಗಿ ತಿಳಿದು ಬಂದಿದೆ. ಸೋಂಕು ತಡೆಗೆ ಸಂಬಂಧಿಸಿದ ಔಷಧ, ಅವುಗಳ ಅಭಿವೃದ್ಧಿ ಕಾರ್ಯದ ವೈಖರಿ, ಹೊಸ ಔಷಧಗಳ ಸಂಶೋಧನೆ, ಅವುಗಳ ಪರೀಕ್ಷೆ, ಫಲಿತಾಂಶ ಮೊದಲಾದ ವಿಚಾರಗಳ ಕುರಿತಾಗಿಯೂ ಮೋದಿ ಸಂಶೋಧಕರಿಂದ ಮಾಹಿತಿ ಪಡೆದುಕೊಂಡಿದ್ದಾರೆ.

ಕೊರೋನಾ ಹೋರಾಟಕ್ಕೆ ಬಳಸಲು ಸಂಶೋಧಕರು ಈಗ ಲಭ್ಯವಿರುವ ಔಷಧಗಳನ್ನೇ ಬಳಕೆ ಮಾಡಿ, ಹೊಸ ಆವಿಷ್ಕಾರ ಗಳನ್ನು ಸಿದ್ಧಪಡಿಸುವ ನಿಟ್ಟಿನಲ್ಲಿ ಕಾರ್ಯ ಪ್ರವೃತ್ತರಾಗಿರುವ ಬಗ್ಗೆಯೂ ಪ್ರಧಾನಿ ಅವರಿಗೆ ಈ ವೇಳೆ ಮಾಹಿತಿ ನೀಡಿದ್ದಾರೆ. ಈ ಹಿನ್ನೆಲೆಯಲ್ಲಿ ಈಗಾಗಲೇ ನಾಲ್ಕು ಬಗೆಯ ಔಷಧಗಳನ್ನು ಬಳಕೆ ಮಾಡಲಾಗಿದ್ದು, ಅವುಗಳ ಕಾರ್ಯವೈಖರಿಯ ಪರೀಕ್ಷೆ ನಡೆಸಲಾಗಿದೆ. ಲ್ಯಾಬೋರೇಟರಿ ವೇರಿಫಿಕೇಶನ್­ಗಳನ್ನು ನಡೆಸುವ ಮೂಲಕ ಈ ಔಷಧಗಳು ಎಷ್ಟು ಪರಿಣಾಮ ಬೀರುತ್ತದೆ ಎಂಬುದನ್ನು ತಿಳಿದುಕೊಳ್ಳಲಾಗುವುದು ಎಂದು ವಿಜ್ಞಾನಿಗಳ ಗುಂಪು ತಿಳಿಸಿದೆ. ಅಲ್ಲದೆ ಭಾರತೀಯ ಮೂಲದ ಸ್ಟಾರ್ಟ್ ಆಪ್‌ಗಳು ಸಿದ್ಧಪಡಿಸಿದ RT-PCR ಕಿಟ್­ಗಳ ಕುರಿತಾದ ಮಾಹಿತಿಯನ್ನು ಈ ಸಭೆಯಲ್ಲಿ ಪಡೆದುಕೊಂಡಿದ್ದಾಗಿ ಮೋದಿ ತಿಳಿಸಿದ್ದಾರೆ.