ನಾಸಾದ ಮಾರ್ಸ್ ಹೆಲಿಕಾಪ್ಟರ್­ಗೆ ಭಾರತೀಯ ಮೂಲದ ವಿದ್ಯಾರ್ಥಿನಿ ಸೂಚಿಸಿದ ಹೆಸರು

ವಾಷಿಂಗ್ಟನ್: ನಾಸಾ ಬಾಹ್ಯಾಕಾಶ ಸಂಸ್ಥೆ ತನ್ನ ಮೊದಲ ಮಾರ್ಸ್ ಹೆಲಿಕಾಪ್ಟರ್­ಗೆ ಹೆಸರಿಡಲು ಹೊರಟಿದೆ. ಭಾರತೀಯ ಮೂಲದ, ಅಮೆರಿಕಾದಲ್ಲಿ ವಾಸ್ತವ್ಯವಿರುವ 17 ವರ್ಷದ ವಿದ್ಯಾರ್ಥಿನಿ ವನೀಜಾ ರೂಪಾನಿ ಈ ಹೆಲಿಕಾಪ್ಟರ್‌ಗೆ ಹೆಸರಿಟ್ಟ ಗೌರವವನ್ನು ತನ್ನದಾಗಿಸಿಕೊಂಡಿದ್ದಾಳೆ. ನಾಸಾ ಆಯೋಜಿಸಿದ್ದ “ನೇಮ್ ದಿ ರೋವರ್” ಎಂಬ ಪ್ರಬಂಧ ಸ್ಪರ್ಧೆಯಲ್ಲಿ ಭಾಗವಹಿಸಿದ್ದ ರೂಪಾನಿ ಸೂಚಿಸಿದಂತೆ ಹೆಲಿಕಾಪ್ಟರ್­ಗೆ INGENUITY ಎಂದು ನಾಸಾ ನಾಮಕರಣ ಮಾಡಿದೆ.

ಆ ಮೂಲಕ ಭೂಮಿಯ ಹೊರತಾಗಿ ಬೇರೆ ಗ್ರಹದಲ್ಲಿ ಹಾರಾಟ ನಡೆಸಿರುವ ಹೆಲಿಕಾಪ್ಟರ್­ಗೆ ಈಗ ಹೊಸ ಹೆಸರು ಸಿಕ್ಕಿದೆ. ಸೆವೆಂತ್ ಗ್ರೇಡರ್ ಅಲೆಕ್ಸಾಂಡರ್ ಮ್ಯಾಥರ್ ಅವರ ಪ್ರಬಂಧವನ್ನು ಆಧರಿಸಿ, ಭಾರತೀಯ ಮೂಲದ ಹುಡುಗಿ ಸೂಚಿಸಿದ ಹೆಸರನ್ನು ಆಯ್ಕೆ ಮಾಡಿಕೊಂಡಿದ್ದು, ಅದನ್ನೇ ಮಾರ್ಸ್ ಹೆಲಿಕಾಪ್ಟರ್­ಗೆ ಇಡಲಾಗಿದೆ. ಅಮೇರಿಕಾದ ವಿವಿಧೆಡೆಯಿಂದ ಸುಮಾರು 28,000 ವಿದ್ಯಾರ್ಥಿಗಳು ಈ ಸ್ಪರ್ಧೆಯಲ್ಲಿ ಭಾಗವಹಿಸಿದ್ದು, ಅದರಲ್ಲಿ ರೂಪಾನಿ ಅವರು ಸೂಚಿಸಿದ ಹೆಸರನ್ನು ಆಯ್ಕೆ ಮಾಡಿರುವುದಾಗಿ ನಾಸಾ ತನ್ನ ಅಧಿಕೃತ ಟ್ವಿಟ್ಟರ್ ಖಾತೆಯಲ್ಲಿ ತಿಳಿಸಿದೆ.

ಇನ್ನು ರೂಪಾನಿ ತನ್ನ ಪ್ರಬಂಧದಲ್ಲಿ ‘ಅಂತರ್ ಗ್ರಹದ ಪ್ರಯಾಣದ ಸವಾಲುಗಳನ್ನು ನಿವಾರಿಸಲು ಪ್ರಯತ್ನಿಸುತ್ತಿರುವ ಜನರ ತಾಳ್ಮೆ ಮತ್ತು ಪರಿಶ್ರಮದ ಕಾರಣದಿಂದಲೇ ಇತರರಿಗೆ ಬಾಹ್ಯಾಕಾಶದ ಕುರಿತ ಅದ್ಭುತ ವಿಚಾರಗಳನ್ನು ತಿಳಿಯಲು ಅವಕಾಶ ಮಾಡಿಕೊಡುತ್ತದೆ’ ಎಂದು ನಾಸಾ ತಿಳಿಸಿದ್ದು, ಇದು ರೂಪಾನಿಯವರ ದೃಷ್ಟಿಕೋನ ಎಂಬುದಾಗಿಯೂ ತಿಳಿಸಿದೆ. ನಮ್ಮ ಪರಿಧಿಯನ್ನು ಮೀರಿ ಬ್ರಹ್ಮಾಂಡದ ಎಲ್ಲಾ ವಿಚಾರಗಳ ಬಗ್ಗೆ ಬೆಳಕು ಚೆಲ್ಲುವ ಕುರಿತಂತೆ ರೂಪಾನಿ ಪ್ರಬಂಧ ಬರೆದಿದ್ದಾರೆ ಎಂದು ಸಂಸ್ಥೆ ಮೆಚ್ಚುಗೆ ಸೂಚಿಸಿದೆ.

ಇನ್ನು ಈ ಕುರಿತಂತೆ ರೂಪಾನಿ ತಾಯಿ ನೌಶೀನ್ ಮಾತನಾಡಿದ್ದು, ಆಕೆಗೆ ಬಾಲ್ಯದಿಂದಲೂ ಬಾಹ್ಯಾಕಾಶ ವಿಜ್ಞಾನ ಆಸಕ್ತಿಯ ವಿಷಯವಾಗಿದೆ. ಆಕೆ ಮತ್ತು ಆಕೆಯ ತಂದೆ ಸದಾ ಕಾಲ ಬಾಹ್ಯಾಕಾಶದ ಕುರಿತಂತೆ ಚರ್ಚೆ ನಡೆಸುತ್ತಾರೆ. ಈಗ ನಾಸಾದ ಮಾರ್ಸ್ ಹೆಲಿಕಾಪ್ಟರ್­ಗೆ ತನ್ನ ಮಗಳು ಸೂಚಿಸಿರುವ ಹೆಸರಿಟ್ಟಿರುವುದು ಸಂತೋಷ ತಂದಿದೆ ಎಂದೂ ಅವರು ತಿಳಿಸಿದ್ದಾರೆ.

ಇನ್ನು ಈ ಹೆಲಿಕಾಪ್ಟರ್ ಜುಲೈನಲ್ಲಿ ಭೂಮಿಯಿಂದ ಹೊರಡಲಿದ್ದು, ಮುಂದಿನ ಫೆಬ್ರವರಿ ತಿಂಗಳಿನಲ್ಲಿ ಮಾರ್ಸ್­ನ ಜೆಜೆರೋ ಕ್ರೇಟರ್­ನಲ್ಲಿ ಇಳಿಯಲಿದೆ ಎಂದು ನಾಸಾ ಮಾಹಿತಿ ನೀಡಿದೆ.