ಕೆಲಸದ ನಂತರ, ಅಗತ್ಯವಿರುವವರಿಗೆ ಮಾಸ್ಕ್ ತಯಾರಿಸಿ ಕೊಡುತ್ತಿರುವ ಮಧ್ಯಪ್ರದೇಶದ ಪೊಲೀಸ್

ಮಧ್ಯಪ್ರದೇಶ : ಕೊರೋನಾದಿಂದ ರಕ್ಷಿಸಲು ಅನೇಕ ರಕ್ಷಣಾ ಕ್ರಮಗಳನ್ನು ಅನುಸರಿಸುವಂತೆ ಕೇಂದ್ರ, ರಾಜ್ಯ ಸರ್ಕಾರಗಳು ತಿಳಿಸುತ್ತಲೇ ಬಂದಿವೆ. ಮುಖ ಮಚ್ಚಿಕೊಳ್ಳುವ ಸಲುವಾಗಿ ಮಾಸ್ಕ್ ಧರಿಸುವಂತೆಯೂ ಆರೋಗ್ಯ ಸಚಿವಾಲಯ ತಿಳಿಸಿದೆ. ಆದರೆ ಅವುಗಳ ಲಭ್ಯತೆ ಕಡಿಮೆ ಇರುವುದರಿಂದ ಮತ್ತು ಸಾಮಾನ್ಯ ಜನರಿಗೆ ಅವುಗಳನ್ನು ದಿನನಿತ್ಯ ಖರೀದಿಸಿ ಬಳಕೆ ಮಾಡಲು ಸಾಧ್ಯವಿಲ್ಲದ ಕಾರಣ ಅವರು ಬಟ್ಟೆ, ಸೀರೆಗಳನ್ನು ಬಳಸುತ್ತಿದ್ದಾರೆ. ಅವರೆಲ್ಲರಿಗೂ ಉಪಯೋಗವಾಗುವಂತೆ ಅನೇಕ ಸಂಘ ಸಂಸ್ಥೆಗಳು, ಜನರು ಬಟ್ಟೆ ಮಾಸ್ಕ್­ಗಳನ್ನು ಮನೆಯಲ್ಲಿಯೇ ತಯಾರಿಸಿ ಜನಸಾಮಾನ್ಯರಿಗೆ ನೀಡುವ ಕೆಲಸವನ್ನೂ ಮಾಡುತ್ತಿದ್ದಾರೆ. ಇದೀಗ ಮಧ್ಯಪ್ರದೇಶದ ಪೊಲೀಸ್ ಕಾನ್ಸ್ಟೇಬಲ್ ಸೃಷ್ಟಿ ಶ್ರೋತ್ರೀಯಾ ಅವರೂ ಮಾಸ್ಕ್ ತಯಾರಿಸಿ ಅಗತ್ಯವಿರುವ ಜನರಿಗೆ ನೀಡುವ ಮೂಲಕ ಕೆಲಸದ ಜೊತೆಗೆ ಸಮಾಜ ಸೇವೆ ಮಾಡಲಾರಂಭಿಸಿದ್ದಾರೆ.

ಕರ್ತವ್ಯದ ಸಂದರ್ಭದಲ್ಲಿ ಕರ್ತವ್ಯ ನಿಭಾಯಿಸಿ, ಉಳಿದ ಅವಧಿಯಲ್ಲಿ ಮುಖಗವಸು ತಯಾರಿಸಿ ಅಗತ್ಯ ಇರುವವರಿಗೆ ನೀಡುವ ಕೆಲಸ ಮಾಡುತ್ತಿದ್ದು, ಅವರ ಈ ಕಾರ್ಯವನ್ನು ಅವರ ಗೆಳೆಯರು ವಿಡಿಯೋ ಮಾಡಿ ಸೋಷಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡಿದ್ದಾರೆ. ಇನ್ನು ತಾನು ತಯಾರಿಸಿದ ಮಾಸ್ಕ್­ಗಳನ್ನು ಶ್ರೋತ್ರಿಯಾ ತನ್ನ ಸಹೋದ್ಯೋಗಿಗಳು ಮತ್ತು ಜನ ಸಾಮಾನ್ಯರಿಗೆ ನೀಡುತ್ತಿದ್ದು, ತನಗೆ ಈ ಕಾರ್ಯ ಅತ್ಯಂತ ತೃಪ್ತಿ ನೀಡಿರುವುದಾಗಿಯೂ ತಿಳಿಸಿದ್ದಾರೆ.

ಇನ್ನು ಇವರು ತಯಾರಿಸುವ ಮಾಸ್ಕ್­ಗಳನ್ನು ಪೊಲೀಸರೂ ಬಳಕೆ ಮಾಡಬಹುದು ಎಂದು ಐಎಎನ್ಎಸ್ ತಿಳಿಸಿದೆ. ಇನ್ನು ಇವರ ಕಾರ್ಯಗಳಿಗೆ ಮೆಚ್ಚುಗೆ ಸೂಚಿಸಿರುವ ಶ್ರೋತ್ರಿಯಾ ಕಾರ್ಯ ನಿರ್ವಹಿಸುತ್ತಿರುವ ಠಾಣೆಯ ರೋಹಿತ್ ಅವರು ಮೆಚ್ಚುಗೆ ಸೂಚಿಸಿದ್ದಾರೆ. ತಮ್ಮ ಠಾಣೆಗೂ ಶ್ರೋತ್ರಿಯಾ ಕಾರ್ಯ ಹೆಮ್ಮೆ ತಂದಿದೆ ಎಂದು ತಿಳಿಸಿದ್ದಾರೆ.