ಅಭಿನಂದನ್­ಗೆ­­ ವೀರ ಚಕ್ರ, ಬಾಲಕೋಟ್ ಪೈಲೆಟ್­ಗಳಿಗೆ ಶೌರ್ಯ ಪದಕ ಸನ್ಮಾನ ಸಾಧ್ಯತೆ

ನವದೆಹಲಿ: ಭಾರತದ ವಾಯುಗಡಿಯೊಳಗೆ ನುಸುಳಲು ಪ್ರಯತ್ನಿಸಿದ ಪಾಕಿಸ್ಥಾನದ ಎಫ್-16 ಯುದ್ಧ ವಿಮಾನವನ್ನು ಹೊಡೆದುರುಳಿಸಿದ ವಾಯುಸೇನೆಯ ವಿಂಗ್ ಕಮಾಂಡರ್ ಅಭಿನಂದನ್ ವರ್ತಮಾನ್ ಅವರಿಗೆ ಸೇನೆಯ ಅತ್ಯುನ್ನತವಾದ ಗೌರವ ವೀರ ಚಕ್ರವನ್ನು ನೀಡಿ ಗೌರವಿಸಲು ಕೇಂದ್ರ ಸರ್ಕಾರ ನಿರ್ಧರಿಸಿದೆ ಎಂದು ಮೂಲಗಳು ತಿಳಿಸಿವೆ.

ಮಾತ್ರವಲ್ಲದೇ, ಬಾಲಕೋಟ್ ಒಳಗೆ ಮಿರಾಜ್-2000 ಯುದ್ಧ ವಿಮಾನದೊಂದಿಗೆ ನುಗ್ಗಿ ಬಾಂಬ್ ಹಾಕಿ ಉಗ್ರರ ಶಿಬಿರಗಳನ್ನು ಧ್ವಂಸಪಡಿಸಿದ ಕಾರ್ಯದಲ್ಲಿ ಪಾಲ್ಗೊಂಡ ಎಲ್ಲಾ ಪೈಲೆಟ್­ಗಳಿಗೂ ವಾಯುಸೇನೆಯ ಶೌರ್ಯ ಪದಕಗಳನ್ನು ನೀಡಿ ಗೌರವಿಸಲಾಗುತ್ತದೆ ಎಂದು ಹೇಳಲಾಗಿದೆ.

ಫೆ.27ರಂದು ಬಾಲಕೋಟ್ ವೈಮಾನಿಕ ದಾಳಿಗೆ ಪ್ರತಿಕ್ರಿಯೆಯಾಗಿ ಭಾರತದ ವಾಯುಗಡಿಯಲ್ಲಿ ಒಳನುಸುಳಲು ಪ್ರಯತ್ನಿಸಿದ್ದ ಪಾಕಿಸ್ಥಾನ ಎಫ್-16 ಯುದ್ಧವಿಮಾನವನ್ನು ಅಭಿನಂದನ್ ಅವರು ಮಿಗ್-21 ವಿಮಾನದ ಮೂಲಕ ಅಟ್ಟಾಡಿಸಿಕೊಂಡು ಹೋಗಿ ಉರುಳಿಸಿದ್ದರು. ಈ ವೇಳೆ ಅವರ ವಿಮಾನವೂ ಪತನಗೊಂಡು ಪಿಓಕೆ ಪ್ರದೇಶಕ್ಕೆ ಬಿದ್ದಿದ್ದರು. ಈ ವೇಳೆ ಪಾಕಿಸ್ಥಾನಿಗಳು ಅವರನ್ನು ಬಂಧಿಸಿದ್ದರು. ಬಳಿಕ ಎರಡು ದಿನಗಳ ತರುವಾಯ ಅವರನ್ನು ವಿಧಿಯಿಲ್ಲದೆ ಪಾಕಿಸ್ಥಾನ ಅಟ್ಟಾರಿ ಗಡಿ ಮೂಲಕ ಭಾರತಕ್ಕೆ ಕಳುಹಿಸಿಕೊಟ್ಟಿತ್ತು.

ಅವರ ಈ ಶೌರ್ಯಕ್ಕಾಗಿ ವೀರ ಚಕ್ರ ನೀಡಿ ಗೌರವಿಸುವಂತೆ ವಾಯುಸೇನೆ ಸರ್ಕಾರಕ್ಕೆ ಶಿಫಾರಸ್ಸು ಮಾಡಿದೆ. ಈ ಶಿಫಾರಸ್ಸನ್ನು ಸರ್ಕಾರ ಒಪ್ಪಿಕೊಂಡಿದೆ ಎಂದು ಹೇಳಲಾಗಿದೆ. ಅಲ್ಲದೇ ಬಾಲಕೋಟ್ ವೈಮಾನಿಕ ದಾಳಿಯಲ್ಲಿ ಪಾಲ್ಗೊಂಡ ವಾಯುಸೇನೆಯ ಎಲ್ಲಾ ವೀರರಿಗೂ ಶೌರ್ಯಕ್ಕಾಗಿನ ಪದಕವನ್ನು ನೀಡಿ ಗೌರವಿಸಲಾಗುತ್ತದೆ ಎನ್ನಲಾಗಿದೆ.