ಮೋದಿ ಬಂದ ಬಳಿಕ ನೆಲಕಚ್ಚಿದ ಬಾಂಗ್ಲಾ ಗೋಮಾಂಸ ವ್ಯಾಪಾರ

ನವದೆಹಲಿ: ನರೇಂದ್ರ ಮೋದಿ ಸರ್ಕಾರ ಆಡಳಿತಕ್ಕೆ ಬಂದ ಬಳಿಕ ಬಾಂಗ್ಲಾದೇಶದಲ್ಲಿ ಗೋಮಾಂಸ ವ್ಯಾಪಾರ ಭಾರೀ ಇಳಿಮುಖವಾಗಿದೆ. ಕೇಂದ್ರ ಸರ್ಕಾರ ಭಾರತ-ಬಾಂಗ್ಲಾ ಗಡಿಯಲ್ಲಿ ಕಟ್ಟುನಿಟ್ಟಿನ ಕಣ್ಗಾವಲನ್ನು ಏರ್ಪಡಿಸಿ ಅಕ್ರಮ ಗೋಸಾಗಾಟಕ್ಕೆ ಕಡಿವಾಣ ಹಾಕಿರುವುದೇ ಇದಕ್ಕೆ ಕಾರಣ.

ಭಾರತದಿಂದ ಅಕ್ರಮವಾಗಿ ಬಾಂಗ್ಲಾದೇಶಕ್ಕೆ ಗೋವುಗಳು ಸಾಗಾಣೆಯಾಗುವುದನ್ನು ತಡೆಯಲೆಂದೇ ಸರ್ಕಾರ 30 ಸಾವಿರ ಬಿಎಸ್‌ಎಫ್ ಯೋಧರನ್ನು ನಿಯೋಜಿಸಿದೆ. ಪ್ರತಿನಿತ್ಯವೂ ಗೋ ಕಳ್ಳರ ಗುಂಪು ಯೋಧರ ಕೈಗೆ ಸಿಕ್ಕಿ ಬೀಳುತ್ತಿದೆ. ಇದರಿಂದಾಗಿ ಬಾಂಗ್ಲಾಗೆ ಭಾರತದ ಗೋವುಗಳು ಸಾಗಾಣೆಯಾಗುವ ಪ್ರಮಾಣ ಗಣನೀಯವಾಗಿ ಕುಸಿದಿದೆ. ಇದು ಬಾಂಗ್ಲಾದ ಗೋ ಮಾಂಸ ವ್ಯಾಪಾರದ ಮೇಲೆ ತೀವ್ರ ಹೊಡೆತ ನೀಡಿದೆ.

ಈ ಹಿಂದೆ ಪ್ರತಿವರ್ಷ 2 ಮಿಲಿಯನ್ ಹಸುಗಳು ಬಾಂಗ್ಲಾಗೆ ಕಳ್ಳ ಸಾಗಾಣೆಯಾಗುತ್ತಿದ್ದವು, ಇದರಿಂದ 600 ಮಿಲಿಯನ್ ಡಾಲರ್ ವ್ಯಾಪಾರವಾಗುತ್ತಿತ್ತು, ಬಾಂಗ್ಲಾದಲ್ಲಿ ಇದನ್ನು ಕಾನೂನಾತ್ಮಕ ಎಂದೇ ಪರಿಗಣಿಸಲಾಗಿದೆ. ಆದರೆ ಕೇಂದ್ರದಲ್ಲಿ ಮೋದಿ ಸರ್ಕಾರ ಬಂದ ಬಳಿಕ ಇದೆಲ್ಲದಕ್ಕೂ ಅಂತ್ಯ ಬಿದ್ದಿದೆ.

ಯೋಧರ ಕಣ್ಣು ತಪ್ಪಿಸಿ ಗೋವುಗಳನ್ನು ಸಾಗಾಣೆ ಮಾಡುವುದು ಅಷ್ಟು ಸುಲಭದ ಮಾತಲ್ಲ. ಹೀಗಾಗಿ ಬಾಂಗ್ಲಾದಲ್ಲಿ ಕಳೆದ ಆರು ತಿಂಗಳಿನಿಂದ ಗೋವುಗಳ ಬೆಲೆ ಶೇ.40ರಷ್ಟು ದುಬಾರಿಯಾಗಿದೆ. ಅಲ್ಲದೇ ಎರಡು ಗೋಹತ್ಯಾ ಯುನಿಟ್‌ಗಳನ್ನೂ ಬಂದ್ ಮಾಡಲಾಗಿದೆ. 4 ಸಾವಿರ ಮಂದಿ ಕೆಲಸ ಕಳೆದುಕೊಂಡಿದ್ದಾರೆ. ಇದರಿಂದ  ಬಾಂಗ್ಲಾದ ಆರ್ಥಿಕತೆಗೆ ಶೇ.3ರಷ್ಟು ನಷ್ಟವಾಗುತ್ತಿದೆ,

ಗಡಿಯಲ್ಲಿ ಯೋಧರನ್ನು ಕಣ್ಗಾವಲಿಗೆ ಇರಿಸುವ ಮೂಲಕ ಮೋದಿ ಸರ್ಕಾರ ಅಕ್ರಮ ಗೋಸಾಗಾಣೆಗೆ ಕಡಿವಾಣ ಹಾಕಿರುವುದು ಶ್ಲಾಘನೀಯ ಕಾರ್ಯ. ಇದರಿಂದ ಭಾರತೀಯ ಗೋ ತಳಿಗಳ ಸಂರಕ್ಷಣೆಯೂ ಸಾಧ್ಯವಾಗಲಿದೆ.